మీ శ్రేయోభిలాషి

తారాగణం: రాజేంద్రప్రసాద్,నరేష్,మేధ
గాత్రం: బాలు
సాహిత్యం: వెనిగెళ్ళ రాంబాబు
సంగీతం: కోటి
నిర్మాత: డా.వై.సోనియా రెడ్డి
దర్శకత్వం: వి.ఈశ్వర్‌రెడ్డి
సంస్థ: విసు ఫిలింస్ ప్రైవేట్ లిమిటెడ్




పల్లవి:

ఆత్మీయత కరువైనా అంధకారమెదురైనా
బ్రతకడమే బరువైనా స్థితిగతులవి ఏమైనా
చిరునవ్వులతో బ్రతకాలి చిరంజీవిగా బ్రతకాలి
చిరునవ్వులతో బ్రతకాలి చిరంజీవిగా బ్రతకాలి

చిరునవ్వులతో బ్రతకాలి చిరంజీవిగా బ్రతకాలి
ఆనందాలను అన్వేషిస్తూ అందరికోసం బ్రతకాలి
అందరినీ బ్రతికించాలి
చిరునవ్వులతో బ్రతకాలి చిరంజీవిగా బ్రతకాలి

చరణం1:

బ్రతుకే నీకు బరువైతే ఆ భారం దించుకో
బరువేదైన గురితో ఓ నలుగురితో పంచుకో
కలతే లేని జీవితమంటే విలువే లేదులే
అలుపే లేక అవలీలగ ఏ గెలుపూ రాదులే
నింగినంటు ఎవరెస్టైనా నేల నుండి మొదలవతుంది
నమ్ముకోకు అదృష్టాన్ని నమ్ముకో ధైర్యాన్ని
మెరుపులే పిడుగులై ఉరుముతున్నా
ఉరకలు వేసే కిరణం జీవితం

చిరునవ్వులతో బ్రతకాలి చిరుదివ్వెలుగా వెలగాలి
చిరునవ్వులతో బ్రతకాలి చిరుదివ్వెలుగా వెలగాలి
లోకం నిండిన శోకం తుడిచే వేకువలా ఉదయించాలి
వెన్నెలలే కురిపించాలి
చిరునవ్వులతో బ్రతకాలి చిరంజీవిగా బ్రతకాలి

చరణం2:

ఎదిగే పక్షి రెక్కకు సహజం ఎగిరే లక్షణం
వదిలేస్తుంది నిన్నటి గూటిని కదిలే ఆ క్షణం
ఏదీ నీది కాదు అనుకో ఏద్దో నాటికి
ఆయినా రేపు మిగిలే ఉంది ఆశావాదికి
కొమ్మలన్ని చుక్కలవైపే కోరి కోరి చూస్తున్నా
మట్టితోటి అనుబంధాన్ని చెట్టు మరువగలదా
చీడలే నీడలై వీడకున్నా
అందరి బృందావనమే జీవితం

చిరునవ్వులతో బ్రతకాలి శ్రీకారంలా బ్రతకాలి
చిరునవ్వులతో బ్రతకాలి శ్రీకారంలా బ్రతకాలి
గతమంతా కనుమరుగవుతున్నా నిన్నటి స్వప్నం నిలవాలి
నీ సంకల్పం గెలవాలి
చిరునవ్వులతో బ్రతకాలి చిరంజీవిగా బ్రతకాలి

చరణం3:

ఆశే నిన్ను నడిపిస్తుంది ఆకాశానికి
ఆశే దారి చూపిస్తుంది అవకాశానికి
ఆశే నీకు లక్ష్యం చేరే అస్త్రం మిత్రమా
ఆశే నీకు ఆయువు పెంచే అమృతం నేస్తమా
ఆశ వెంట ఆచరణ ఉంటే అద్భుతాలు నీ సొంతం
ఆదమరచి నిదురిస్తుంటే అందదే వసంతం
నిప్పులే గుండెలో నిండుతున్నా
ఉప్పొంగే జలపాతం జీవితం

చిరునవ్వులతో బ్రతకాలి చిగురాశలతో బ్రతకాలి
చిరునవ్వులతో బ్రతకాలి చిగురాశలతో బ్రతకాలి
అంతిమ విజయం అనివార్యమని ఆశిస్తూ నువ్వు బ్రతకాలి
ఆశయాన్ని బ్రతికించాలి
చిరునవ్వులతో బ్రతకాలి చిరంజీవిగా బ్రతకాలి

చరణం4:

నీడే నిన్ను భయపెడితే ఆ నేరం వెలుగుదా
నలుసే నిన్ను భాధపెడితే ఆ దోషం కంటిదా
నేస్తం చూడు జీవితమంటే నిత్యం సమరమే
సమరంలోనే కనుమూస్తే ఆ మరణం అమరమే
పారిపోకు ఏ ఓటమికి ప్రపంచాన్ని విడిచి
జారిపోకు పాతాళానికి బ్రతుకుబాట మరచి
వరదలా మృత్యువే తరుముతున్నా
ఆరని అగ్నిజ్వాలే జీవితం

చిరునవ్వులతో బ్రతకాలి శిఖరంలా పైకి ఎదగాలి
చిరునవ్వులతో బ్రతకాలి శిఖరంలా పైకి ఎదగాలి
చావుకు చూపే ఆ తెగింపుతో జీవించాలనుకోవాలి
నువ్వు జీవించే తీరాలి
చిరునవ్వులతో బ్రతకాలి చిరంజీవిగా బ్రతకాలి

చరణం5:

విజయం తలుపు తెరిచేవరకు విసుగే చెందకు
విసుగే చెంది నిస్పృహతో నీ వెనకే చూడకు
చిందే చమట చుక్కకు సైతం ఉంది ఫలితమే
అది అందే వరకు సహనంతో సాగాలి పయనమే
అంతరాత్మ గొంతే నులిమి శాంతి కొరుకుంటవా
అల్లుకున్న అనుబంధాలే తల్లడిల్లిపోవా
అలజడే నిలువునా అలుముకున్నా
అలుపెరుగుని చైతన్యం జీవితం

చిరునవ్వులతో బ్రతకాలి చిరంజీవిగా బ్రతకాలి
చిరునవ్వులతో బ్రతకాలి చిరంజీవిగా బ్రతకాలి
ఆనందాలను అన్వేషిస్తూ అందరికోసం బ్రతకాలి
అందరినీ బ్రతికించాలి
చిరునవ్వులతో బ్రతకాలి చిరంజీవిగా బ్రతకాలి
చిరునవ్వులతో బ్రతకాలి చిరంజీవిగా బ్రతకాలి
ఆనందాలను అన్వేషిస్తూ అందరికోసం బ్రతకాలి
అందరినీ బ్రతికించాలి

~~~~~~~~~~~~~~~~~~~~~~~~~~~~~~

| |

~~~~~~~~~~~~~~~~~~~~~~~~~~~~~